اللجنة المدنية للحفاظ على مكاسب الثورة

صار ليومة في دار الثقافة لقاء جمع العديد من مناضلي المدينة دعات ليلو لجنة تكونت جديدة اسمها اللجنة المدنية للحفاظ على مكاسب الثورة باش تعرف بروحها و تعطي نضرتها للاومور الللي قاعدة تصير في بلادنا.. الاغلبية اجمعو على انو بلادنا رغم تاريخها النضالي الى انها ما عرفتش كيفاه تتصرف بعد الثورة حيث انو المعتمد اللي شارك في تزوير الانتخابات البلدية مازال شاد بلاصتو و كذلك الرساءل مازالت تخرج باسم رءيس البلدية..من النقاط الاساسية اللي خرج بيها اللقاء هي التأكيد على تعين معتمد جديد نظيف يا حبذا لو يكون ولد الجهة من حاملي الشهادات العليا يكون كطرف انجمو نتفاوضو معاه في القضاية متاع البلاد..و مبعد تجي حكاية المجلس البلدي اللي مباعد ما يتبدل المعتمد انشاء الله, تتقدم اسامي متع مواطنين و يقع الوفاق عليهم من قبل الاحزاب و الجمعيات و المنظمات اللي مش يكون بديل للمجلس الحالي لين تجي الانتخابات...
بادرة طيبة من المواطنين اللي اسسوا اللجنة هاذي وفمة شكون مل الاحزاب و الجمعيات و المنظمات مش يطلعو بيان مساندة و يبرهنو على استعدادهم للمساعدة و التشاور مع اللجنة و مضابينا البقية يعملو كيفهم و المواطنين يلتفو مع اللجنة هاذي من أجل مصلحة جبنيانة.

الممارسات هية هية

باللاهي تتذكرو عام 2011 كي عملنا ثورة و ماتو على خاطرها الشهداء و شهدنا على هكل أيامات "بن علي هرب بن علي هرب"..وقتها قلنا سايي الدنيا مش تتبدل مش نوليو مل المجتمعات المتقدمة و مش تطور الحياة علاش لا مادامو سبب الخرب هز شلتو و هرب...
خلينانرجعو التالي شوية لجوان 2011 بعد خمسة شهور مل الهروب متاع المخلوع نجيو نشوفو نلقاو الممارسات هية هية في جبنيانة ماتبدل شئ...
يا سيدي من سيدك جات هكة شوية توصيات منعرش مل ولاية ولا منين للمعتمدية باش تخدم المعطلين عن العمل متاعنا في الحضاءر..حاجةباهية لولاد بلادنا عنا خيرات بطالة عل الاقل فما حل مؤقت و احنا عايشين في الوقتية..المشكل انها المعتمدية ما فيها حد قعدت كان مرا لا علينا في ذكر اسمها و هية يا بوقلب مرا كي ألف راجل هي اللي قايمة بكل شي من أوراق لمطالب متع خدمة و الخ...هاضة الكل كلام تحفون لكن المشكلة وين انها توصلها اوامر من عند المعتمد من صفاقس و تزيد تتأثر بتوصيات متع زعيم العمال!! الي هوة ولا الفاتق الناطق في هل اليلاد منعرفش بأنا شرعية و بأنا منطق...مجبود الحديث على اللي يخدم في الحضيرة,فيهم عباد تخدم بقلب و رب و عاطية ماعندها و الباقي اللي داخلين بوجوهم و بتزكية من عند سي زعيم العمال قاعدين في القهاوي ما علبالهمش بالطقس كان عمل علينا مزية يمشيلك مع العشرة و سويعة من زمان و يروح!! و مباعد تجيه شهريتو و يشيخ بيها..تو يا عباد ربي هاذي مش سِرقة عيني عينك لا و المشكل انهم واخذين بلاصة واحد مستحق هاكل 180دينار أكثر منهم غلطو الوحيدة انو ماعندوش انخراط.
يا رجال جبنيانة ما تخليوش البلاد توصل للهاوية و زايد الفساد ما يجيب كان الفساد المهم انو رجال جبنيانة يتحركو تو قبل غدوة...

جبنيانة قبل و بعد الثورة

جبنيانة من قبل و هيا تعاني سوى في عهد بورقيبة ولا في عهد المخلوع شي ما ثبدل لول جا ضربوه بالطماطم و الثاني ما خليناهوش يرقد ساعة ثنين يجيه تليفون يقولو راهو الليسي يسب فيك بكل ثحضر...
من وقتها عاد لا فما لا بلدية تنظف رءيسها مسايبها و متلاهي يحفر هوة و علي بابا انتي تحوس في الهناشر تفر بروحك طايح كان في حفرة...و لامعتمدية تخدم لاهين كان بالشعبة هضاكة نعطيوه منحة راهو متاعنا و لاخر لا ما دفعش 26-26 ....و المركز عاد خلي و اسكت في عوض يشد الزوفر قعد لاهي بجماعة السياسة يا التزام للتلامذة و حبس للطلبة يا قاعدين في قهوة البطالة ولا قدام بسحاق يعسو على الpdp و التجديد...
الحوانت ديما تعيط كساد المواطن يقلك الشهرية وفات نهر 17 في الشهر ترسيلو يتسلف و يوحل فالديون و اش مش يفضها وقتها ترسيلهم الزوز العياط و الفضح...
الجمعيات الرياضية الزوز فالسين اكثر مل مواطن يجيوك في وسط الثنية يقولولك واك راني فلست دورو لا سيقارو لا و النتايج خلي و اسكت كي تشوها عل لول تقول طلعنا و بعد نوليو كي بول الجمل نوخرم التالي...
بعد 14 جانفي الامور انبرنسيب تتحسن..شايي كالعادة المعتمد يتنحى و يرجع في نفس اليلة بقدرة عامل.. البلدية يقعد فيهة كان الكاتب العام و حبو يغورو عليها...الجمعية (CSD) انسحبت ما لقات بيها وين..القباضة هاني كيما خليناهة بعد ما تحرقت كيمة لقيناهة لا بيضوهة لا نضفوهة لا شي خسرو علينا كان حولوهة للحنشة...
وانشاء الله مع الوقت الامور تتحسن و تولي جبنيانة ولاية على حالها...

مرحبا بكم,
يا خويا و يا أختي كثرو الباج فايسبوك متاع جبنيانة ولات الحكاية لمد الفان و أكهو مغير ما ينشطو...
فكرة البلوغ جاتني مل الصيف اللي فات لكن الواحد ماكلو البخل.
حبيت نحل بلوغ نلم فيه كل كبيرة و صغيرة تصير في جبنيانة كيما السياسة سبور ثقافة....
عملت باج فايسبوك باش نبرتاجي أي حاجة جديدة
https://www.facebook.com/pages/Jebeniana/121079171309450