و إن كان مايستحقش يوم فقط يكون مناسبة باش نتكتبوعلى سفيان الشورابي و نذير القطاري إلا أنو فرصة عل الأقل باش نوعيوا الرأي العام بالقضية و نحاولو نظغطو على السلطات باش يسترجعو مواطنينا المخطوفيين في ليبيا منذ 8 سبتمبر 2014...
الحقيقة نذير مانعرفوش أما مدامو مخالط و زميل لسفيان أكيد مش يكون من نفس الطينة و الروح...
سفيان عرفتو من 2009، الراجل اللّي ثاير و مش قابل حتى البلاصة اللي هو اختارها.. مايعجبوش ياسر الكلام اللّي غايب شطرو، حاشتو بالفعل و الخدمة الواضحة اللّي تنجم تشوفها قدام عينيك...
ماننساش إنك أول شخص شجعني و علمني كيفاش نحل مدونة و نحكي فيها على مشاكل جيهتي و قضايا تهم الرأي العام في البلاد في عهد بن علي، كيفاش نولي المواطن الصحافي و ننقل كل كبيرة و صغيرة، قتلي المدونة تكون الفضاء اللي تعبر فيه و ترفض فيه الوضع السائد ماغير بطولات و ماغير ثورجية زايدة..
و بالطبيعة أكل ضحكة و التنبير مع كعبات البيرة، كي قعدنا ثلاثة من ناس أكهو و الباقي مشا يعمل في حاجات أخرى، أكل ركشة هذيكة وين عرفتك على حقيقتك، الشخص اللي يحب يعاون و كي يكبر يكبر اللّي معاه مش وحدو، حكينا على السياسة و التكمبين و على الكورة و على البنات و ختمناها من غدوة بتبحيرة اللّي خسارة ضيعت التصاور متاعها، هانك كي ترجع من ليبيا أبعثهملي خنتفكرو هكل ليّامات...
و سفيان زادة أكلّي كي تتطلعلو في راسو حاجة لازم يعملها، ركبتلك باش تهبط لسيدي بوزيد بعد نهارين من إندلاع الثورة و توثق التحركات و توصلها للعالم، و ركبتلك زادة باش تكون من الداعيين لأول مظاهرة في تونس العاصمة و تفضح ممارسات النظام البوليسي قدام الناس الكل.. و أخيرا ركبتلك باش تمشي لليبيا و تغطي الأحداث اللّي صايرة غادي و اللّي كان من أكثر المواقف شجاعة و نعرفك كي مش ترجع مشك مش تكون نادم عليه القرار...
ربي يرجعك سالم يا شو إنتي و نذير.
