حكاية "حولة"

في بلدتنا الصغيرة تنجم تسمع حكاية ماصارتش و تتنقل من شخص لشخص (بالزيادات أكيد) لين تصبح حقيقية، ككل الحكايات التاريخية اللي ما صارتش قبل لكن بحديثنا عليها نردّوها صحيحة,

و بالطبيعة فمّا حكايات قادرة تخرج للرأي العام و حكايات لا، حكايات تخرج من مواطن عادي ماعليهش ملام أما باش تخرج من إطار شبه طبّي من وسط مستشفى جهوي عملت فيه العباد تحليل و مٍطمنى اللّي سرها الطبي مش يبقى عندهم فهذا شئ عيب و مايصيرش.

ممكن الحاجة الباهية الوحيدة انّي مش تكون فرصة باش كل واحد يفيق على روحو و يحاول يوعي صحابو صغارو خواتو اللي فما حلول تجنبك أمراض كيما هذيكة و تحميك.

و انشاء الله مجتمعنا ما يكونش قاسي عليهم و عائلاتهم كذلك ما تنبذهمش، ماهم الا ولادنا و غلطو ينجمو يداويو (رغم اللي يتكلف برشا) و يعيشو معاه كأي مرض مزمن و يرجعو يتقبلو الحياة...

احصاءات:ظهور 5% فقط من الفتيات أيّام رمضان، جبنيانة

وسط البلاد (وكالات الروج):

كشفت sigma conseil الشركة المتخصصة في استطلاع الأراء و تشويه النسب حسب المصلحة و من يدفع أكثر،  أن 5% فقط من فتيات جبنيانة خرجوا الى وسط البلاد للتجول و الترفيه في المناطق السياحية...
و عند سؤالنا للبعض منهم أكد أن المنطقة لا تشجع الى الخروج و الاستمتاع برائحة المقروض و المخارق، و ذلك لفقدان الثقة في شباب المنطقة الذي يتحول الى داعشي المنظر ربما من كثرت الصيام !

برمجة فنّان الراب "Red Star" في مهرجان ابي اسحاق الجبنياني

تم برمجة حفلة لمجموعة Red Star في مهرجان ابي اسحاق الجبنياني في دورته 32 بجبنيانة من قبل الراعي للحدث دار الثقافة بجبنيانة و ذلك يوم 20 جويلية 2014 بمسرح دار الشعب.
Red Star التي تغني الراب التونسي على أنغام أمريكية مسروقة، أصلهم من مدينة سوسة خيّرو مهرجاننا على العديد المهرجانات و ذلك معرفة منهم بالقاعدة الشعبية الكبييرة لهم في جبنيانة من ناحية، و من ناحية أخرى بحكم أنهم سواحلية ، كرها في الصفاقسية بعد ما عرفو اللي حناي زادة نكرهوهم، في اطار نشر الكراهية بين العباد.
السيد عبد الكريم على رأس مؤسسة دار الثقافة بجبنيانة لسنوات عديدة (ربي يطول في عمرو) أعرب عن فرحه لقبول المجموعة للعرض، و أكد أنهم  أجّلو مسابقة العدو الريفي و السلامية من أجل عيون الشبيبة...
و لعل الطريف في الأمر أن بعض الفصائل الشبابية، فرحت بهذا العرض لما يرمز له بالنجمة الحمراء RED STAR المتعلقة بالشيوعية و الساحة الحمراء الشهيرة الموجودة في موسكو، لعلهم يفرقو بياناتهم كالعادة.

زيارة مهدي جمعة لمونوبري راجح بجبنيانة

أدّى صباح اليوم رئيس الحكومة التونسية زيارة الى مغازة المنجي راجح بجبنيانة من ولاية صفاقس و ذلك في محاولة منه للتعرف على أجواء مدينة جبنيانة و المقدرة الشرائية لمواطينيها في ظل الزيادات و رفع الدعم على المواد الأساسية من قبل حكومته...
و قد استغرب مهدي جمعة من رخص الأسعار في المغازة مقارنة بمغزات عالمية كارفور و غيرها، رغم الزيادات في جميع المواد الغذائية مما دفعه للتساؤل لمدير المغازة السيد منجي راجح الذي أعرب عن رفضه للادلاء بسر نجاحه خوفا من المنافسيين...
و في تفاعله مع المواطنين تعرف على السبب من قبل مواطن شهر "الرووووج" حيث قال له بالحرف الواحد: "تي راهو ي**** يخلص في البنات في 200 دينار أ**** أكهو ! " ...
و ذكر مهدي جمعة أنّه ينوي زيارة معلم سيدي بسحاق و تذوق كاس تاي مقهى الأنس قبل مغادرته.

القبض على عصابة تفكيك السيارات في جبنيانة

نهاركم زين نشاءالله ، رجعت للمدونة و للأسف بخبر يحشم عل لخر، عنّا سنين و نعرفو عصابة خليفة لبيع الشراب و عصابة حافظ الوحيشي للبحث على الأثار... أما هل النهارات ضهرت عصابة جديدة لتفكيك السيارات المسروقة و ضربان نوامر السيري...
العصابة عندها برشا ملّي تخدم على روحها في جبنيانة و تحت غطاء محل لبيع معدات السيارات كوجه لتبيض الأموالو قدام لعباد.
العملية هاذي فيها ربح ببرشا فلوس على خاطر غير قانونية و تتمثل في تركيب النصف السفلي لسيارة عاملة حادث مع النصف الأخر لسيارة مسروقة (numéro de série) باش يقابل النومرو اللي في ال carte grise و أساليب التفكيك متعددة.
أخر خبر انّو الحاكم شدهم جمعة التالي و سيّب الصغار و شدّ في الكبار و كاينو بعث فيهم بطاقة ايداع لتهم أهمها تفكيك السيارات و تهم أخرى...

الشخص المعني بالأمر ماهوش "بكلب سوق" في تعريفنا المتداول، أما هو كلب سوق، خاطر السيد هذا يتغطى بغلاف التدين و لاعبها متقي و لاباس عليه... و السيّد طلع ينتمي للمكتب المحلي لحركة النهضة بجبنيانة و من أبرز مموليه سواء في الحملة الانتخابية اللّي فاتت ولاّ الجاية حيث فمّا حديث يدور انّو خصّص 800 مليون لتمويل الحملة الانتخابية لحركة النهضة في دائرة صفاقس 1 و ماننساوش فلوس اللحم اللي تفرق فيه حركة النهضة هل ليامات في دوائر جبنيانة سكريتو.

و حسب العصافر كعادتنا فمّا جهود حثيثة باش يسلكوهالو و يخرج نظيف عفيف سواء من عايلتو و هذا شئ عادي أو من الحركة اللي ينتميلها و على راسهم نور الدين البحيري بعلاقاتو الموسخة اللّي محافظ عليها و هو "خارج السلطة" في سلك القضاة أو الأمن...

كجبنياني معادش مش نخدم ، نقرى و ناكل و نروح يوميا، مستعد باش نحارب العباد هاذي اللّي غولو و بناو ما بناو بفلوس مسروقة و على حساب لعباد...

حملة أفضح الكازي و قصبة على راس الرازي

إطار شبه سلفي

بعد ما طرّدو الامام عبد المولى و هجّجو المصلين من جامع التقوى جاو لجامع الرحمة و طردو كبف كبف الامام و اللي يخدمو و ياخذو في خمسة فرنك يعيشو بيها عايلاتهم.
العصابة هاذي متكونة من شبه سلفيين يقود فيهم منير اللي يبيع في الحوت ملمد معاه شباب يقود فيهم وين يحب فما شكون حسب ما قالو بعثو لسوريا وهو احتمال راهو في القيروان يترنى على الزمقتال....
ليوما بعد ما شدّو جامع الرحمة في صلاة المغرب الجوامع الكل قامت الأذان الاّ هوما لا و زيد ما صلاّو فيه كان هوما و كعبتين من الناس و معاهم النهضاوي حسن الغرسي ممكن صدفة يحكي معاهم في حلقة نقاش ولا زادة ظاهر فيه الماء يجري تحت ساقينا !!
  

قصّو علينا الماء جاتنا البحيرات

بعد هطول كمّيات كبيـــــــــــرة من الأمطار في جبنيانة بحيرات على حالها توجدت خاصة في طريق الحنشة وين برشا كراهب دخللها الماء للفيلتر و بيّلت و المشمر مشمر و البعض رسّاتلو يعمل دورة كبيرة باش يتعدّى الغداير... 
أما لاباس السلط المحلية المتمثلة في المعتمد و شيخ البلاد قاعدة ادّور و تعاين و بالطبيعة فمّا استنكار و تنديد ...
الشباب متاعنا قاعد يتمتع و يوصل الصورة بسخرية كي يشوف حالة البلاد فمّاش ما الكبارات يشوفو حل جذري للتصريف الصحي للمياه.

الحمدولاه عرفت الاسلام قبل ما نعرف السلفيين !

الحكاية بدات من آمس مجموعة كبيرة من الملتحين (أكثر من 20 شخص ) لمدو رواحهم  و دارو في جبنيانة اللّي عندو سيف و بومب غاز  و هادين على بيّاعة الشراب طلبو منهم باش ما عادش يبيعو في جبنيانة كيما قالو بكل محبة و أخوية  !! 
البعض ملّي يبيع فل الشراب حكا معاهم عادي قالهم في عوض تمشيو للصحاح خليفة و العين ... جايين ليلنا نصوّرو في خمسة فرنك نعيّشو منها عايلاتنا ...
ليومة عاودت رجعة الحكاية وقت اللّي عمك رفيق جاي يفرق في سلعتو على نقاط البيع .. بتليفون تلمدو الملتحين و مشاولو ديراكت يحكيو معاه و هو فل الكرهبة  و جبدو عليه بومب أ غاز و صبحت عاد ندزك و ادزني لين فل اللخر تحزّت و فرقت الحضبة .
الملتحي صابر ماكس اللي عمل تدريبات جهادية ضد شكون اللّهو أعلم و قال لعايلتو راني في سورية ! مشا حارب في حلب و رجع بكل سهولة و ماعندو حتّى خبش يا بو قلب ! قلك راني مستعد نموت عل الحق و الشراب ما يتباعش .... و الغريبة اللّي يحرك فيهم منير الحوّات يشوف فيهم مل البعيد و ما يجيكش عجب اللي هو قاعد يخلص و يخلّص في جماعتو لحساب شكون اللّهو أعلم .
واحد ملّي يبيعو فل الشراب قلك مستعد ندخل للحبس على خاطرهم ...
اللّي يخوف هو أنّو الجماعة الزوز مسلحين بالسيوفة و الفصاصل و كان تتطور الأمور مشينا فيها الزوز مش مسلمين و ممكن ندخلو في معمعة كبيرة تولّي حرب عصابات و حتّى حرب أهلية .
أهالي جبنيانة فدّو مل الجماعة الملتحين و كرهوهم حتّى فل العركة هاذي جاو ضدهم مش عل الشراب لكن على تصرفاتهم و على تاريخ البعض منهم اللي كان سارق و مجرم ..

ظاهرة الكتيبة عل الحيوط

 مجموعة من الشباب المهمش في جبنيانة ما لقات ما تعمل مل فدة و القلق اللي فل البلاد قامت تكتب عل الحيوط  شوية شعارات سياسة و اجتماعية نخليلكم التعليق عليهم...
المجموعة هاذي اسمها الشباب التحرري Jeune libéral ما عندهاش برشة ملي تكونت و ديما تمضي ب JL عاد فما شكون من أولادنا المتخونجين هل الأيامات قال هاذي أكيد "جبنيانة ليوم" !!
و بعد كي خدم مخو شوية ما ضهرلوش فهم اللي هي ممكن شعارات تمس النهضة...صبح يدور فل الليل هو و صحابو يلوجو شكون يكتب فيهم باش يعاتبوه أكيد ! و كي هبل ما عرفش شكون .. مشى كتب في حيط مل الحيوط في وسط البلاد "اكتبو فل النهار كانكم عباد"

الكتابة على جدران المدينة

مبروك علينا المعتمد !!

قلك اللي يستنا خير ملي يتمنى...
نبداو باللي تمنيناه.. في بالي الناس الكل تمنات ولد بلاد هو اللي يشد معتمد لجبنيانة و يكون بالطبيعة عندو شهادة  تخولو يشد مسؤولية كيما هذيكة في بلاد كيما جبنيانة و عبادها اللي نهار كامل يستناو فل العسل من بوفرفزو...
نرجعو للواقع ..لا يزيد موشو ولد بلاد لا يزيد فوق هاضا الكل يطلع نهضاوي ؟
سي رضوان بالزين كان قبل يخدم ضابط عسكري و سيبوه من قضية براكة الساحل..أصلو من ملولش و مسؤول في مكتب حركة النهضة غديكة.
المشكلة اللي الناس الكل تحكي عليها كيفاه الحكومة تعين معتمد نهضاوي ؟
معناها تقريبا رجعنا لنفس المعبوكة .. الحزب الحاكم النهضة " ما تقليش ترويكا" يحب يتغلغل في وسط مؤسسات الدولة الكل من ولاية ،معتمدية ، بلدية و خلي و اسكت عاد على مجالس حماية الثورة اللي لتو لا فهمت علاش موجدين الى حد الأن !!
نفس الممارسات متاع التجمع.. الحزب يهيمن على الدولة و يستعمل موءسساتها باش يستغلها خاصة للتحضير للانتخابات الجاية..
هاذي كانت حال التجمع و تو حال النهضة و زيد عاد الأتو متاع الخطاب الديني ما عندها وين ماشية ...
  

خو سي نور الدين البحيري سيّبوه !

اش مازلت تسمع و اش مازلت تشوف...عرفناها لحكاية مش تصير من وقت اللانتخابات و قلنا اللّي ما ندخلوها بعضها.
ناقصين همّ فالبلاد, ناقصين مجرّمة ! دوب ما حط رجلو فالحكومة سيبلنا خوه ! مش نصبح ما نبعث ولدي للمدرسة كان ما شكون يمشي معاه؟!؟
الحكاية معروفة من قبل يعرفها الكبير و الصغير... سي الدجو خو نور الدين البحيري اعتدى على وليد صغير بالفاحشة كيما مسمينها و بالطبيعة هذا اللّي سمعنا بيه ! تحكم وقتها ب 11 عام حبس تعرف عليه بتفانيه في الواجب.
سي نور الدين ما كذّبش الحكاية لكن قال الللّي خوه محكوم عليه ب4 سنين و عدّا منهم ثلاثة دونك عادي جدّااااا باش يخرج بعفو في عيد الثورة !!
و هكّا جبنيانة تلمّت فيها الاختصاصات الكلّها و اش يهمّنا فل التنمية و المحاسبة مادامنا عنّا علاش نحكيو و نعسوا على صغارنا.

حسام ولد السيس !

عملنا مسيرات على العراق و على فلسطين تقولش علينا بعثيين ولا قوميين...كناٌ مناهضين للامبريالية الامركية و رفضنا دخول شارون لتونس... كناٌ يساريين و وقفنا مع الجهات المحرومة و أولاد الشعب في الحوض المنجمي و بنقردان و دافعنا على حقهم في العمل...ضرٌبنا على القراية على خاطر خواتنا و ريفاقنا الطلبة اللي تحاكمو على خلفية العمل النقابي داخل الجامعة... ساندنا اضراب الجوع متاع 2009 في بالي اللي قامو بيه ولاد بلادنا (صابر و كريم و..) من أجل حقهم في العمل...هذا ما يتسمى شئ من تاريخ الحركة التلمذية بجبنيانة اللي صعيب برشا باش نختزلو نضالات أجيال و سنين في بعض الأسطر.
المشكلة انو التاريخ هذا يلزمو يبقى نقي ممكن حتى مقدس غير قابل للمساس خصوصي من عباد داخلة فيها هكاكة تسب و حاطة الجبنيانين الكل فرد شكارة...
حكاية حسام ولد السيس اللي بلاد كاملة ليومة خايضة عليه و حاطينو في صورة البطل و حامي البلاد و الخ الخ... نساو اللي حسام تشد قبل الثورة على خاطرو يبيع فل الشراب و عدى عامو و رجع يبيع كل العادة كاينو شى ما صار..قعد هكاكة هارب و يبيع و كل مرة تسمع بالبطحة متاعو هدو عليها و ما لقاوهوش لين عاد عملولو لعبة و شدو خوه أشرف باش يسلم روحو.. و هاضاكة اللي صار لكن موش بصفة عادية الراجل شلط روحو في بدنو كامل قدام المركز و كي هزوه للسبيطار ضرب الطبة و كسر المتريال !!
تحكم عليه بالحبس يجي 8 سنين عدى منهم عامين و بعد هرب مع الناس الكل مل الحبس وقت الثورة و كي طلبو منهم باش يرجعو ماحبش و بالطبيعة توة مش تتزادلو فل الربطية. تفاهم مع المنجي راجح باش حدى حد ما يسرقلو المنوبري و خذى تفتوفة من عندو باش مانقولوش 500 د و بيها بيها من غدوة تخلعت و للأمانة موش هوة اللي خلعها لكن ما خلى فيها شئ و هوة يهز و يرد بالكتكات متاعو و يعاونو فيه الشلة متاعو اللي هوما احتمال كبير نفسهم اللي حرقو المركز و الكرهبة متاع الشرطة...
و بعد هل التاريخ الاسود هاضة الكل تقوم مسيرة على خاطرو فل الليسي و رافعين شعار `لا دراسة لا تدريس حتى يخرج ولد السيس` زعمة للدرجة هاذي تميعت القضاية اللي ندافعو عليها !!
من المفارقات؛
يقولو أحوالهم المادية تاعبة تلز يبيع الشراب...ملا شبيه خوه أشرف يصلي على روحو و مرة يخدم مرة لا المهم قانوني و رزق حلال...
يقولو حمى جبنيانة مل المساترية... ملا كل بلاد تخرج الكلوشارات متاعها خليهم يدافعو على بلادهم ! خصوصي بعد ما تحرق المركز و الكرهبة متاع الشرطة !!
مخيبها الموضوعية تردك مكروه يلزمك يا تسكت تحكي عليه بالباهي ... و يبقى السؤال الفلسفي في عوض 'من أنا؟' تو ولا 'وين ماشين؟'

تدوينة الزميل بيغ تراب بوي حول فيلم برسيـبوليس

يلّي مقطوع عليك الماء والعظم والحليب، تفرّجت في لقطة من فيلم وهبطت تسيّب في التجوعيب، يلّي لا عندك لا مستقبل ولا خدمة، ولكن على خاطر في بلاصة مخّك عندك ترمة، تعتقد أنها مشكلتك في الحياة هي تسكير قناة نسمة ، يلّي عمرك ما عشت الحريّة ولا إخترت في حياتك رئيس، وكيف جات الحريّة عملتلنا لحية وقميص، ونصّبت روحك على غيرك قاضي وبوليس.

يلّي دولتك ماهيش مبنيّة، ومؤسساتك ورثة دونيّة، وعامل مجهودك باش تحارب الماسونية والمنظّمات السريّة والقناة الصهيونيّة، وتعتبر أنّ الإحتجاج على الكوميك هو الأولويّة.

يلّي طول حياتك تاكل في الكفوف، وعمرك فوق الثلاثين وباقي تطلب من عند بوك في المصروف، واليوم تحب تجيبهالنا هيئة نهي عن المنكر والأمر بالمعروف، حتى بعد ما تبيّن بالمكشوف أنّك أذكى شويّة من الخروف.

يلّي قرايتك ما تخدّمكش صانع ميكانيك، وتحبّ تنظّر في الفلسفة والفنّ والدّين و البوليتيك، جاوبني برحمة والديك، زعمة الفيلم الإيراني ولا إنتي إلّي بالرّسمي كوميك؟؟

http://trapboy.blogspot.com/

شكرا قناة نسمة لبث الفيلم الايراني و شكرا للخوامجية للدعاية له

الفيلم روعة غير عادي برجولية استمتعت...الفيلم يورينا اش صار في ايران و كيفاه العباد عاشت الفترة هاذيكة ...و بالطبيعة يخلينا نخافو على مستقبل تونس... صحيح موش مش يصير توة و من حزب سياسي معروف لكن ما عادش تقلي فزاعة.. راهو الشي واضح و تحسها خدمة على قاعدة.
الحكاية اللي قلقت الناس الكل..هي تجسيم الذات الالاهية.. انا بورجولية ضدها...لكن تتفكرو كي كنا صغار كنا نستخايلو ربي سبحانو شنوة شكلو ؟
الليهية نفس الوضعية متاع البنية الصغيرة حتى بعد كي كبرت و هية فل الحالة العصبية هاذيكة قعد نفس التصور.
و زيد ما حاربش الاسلام الفيلم بالعكس حارب المتعصبين ليلو اللي خالاو العباد تبعد على دينا..
و أكيد الناس اللي هدو على مقر نسمة خايفين على رواحهم من انو العباد تكشفهم...
باش خرجت مل الفيلم..
1-البنية عاشت التعصب الديني و ما عجبهاش.. مشات لفرانسا و ما عجبهاش التحرر.. دونك الحل هية عيشة وسطية و محافظة الناس الكل تحترم بعضها...
2- الثورة في ايران عملوها الشيوعيين و الاسلاميين و بعد ركبو عليها الاسلاميين.. معناها اللي مازال مل الشييوعيين قاعد يلحس يلزمو يفيق على وضعو من قبل كارو و من تو لا يفوت الفوت...

فكرة تحفونة عملثها مجموعة أهل الكهف الي فيها خونا الفنان زياد الحضري..جات على حيط ممسخ و مهجور(بجنب كوشة ناجي) و عملت عليه جرافيك قوي برشا متاع عباد فنانة بالحق و كتبت عليه مقولات تخص المرحلة اللي تمر بيها البلاد و ممكن اختيار الألوان في بلاصتو يدل شوية على الغموض في مصير البلاد...
بعد ما تصورت هل جرافيك و بعد ما تعبو عليها يجي واحد لا علاقة و يكتب (الفوق عل اليمين) "الله" ما عرفتش اش يقصد بيها أشنية محلها مل اعراب اللهو أعلم !!!
ياخي بعد ثورة 14 جانفي تربط الفن مع الدين و ولا في علاقة ِّصدام